Headerbild

Züri Zoo – gross UND oho!

 

De Fritig isch ganz weidli cho,

d‘Chinde rüefed luut und froh:

„Juhui mir gönd in Zürizoo!“

Dank Bahn und Tram gahts ganz schnäll los.

D’Masoalahalle, die isch famos!

Füecht isches und au zimli warm,

Bald hanget d‘Jagge überem Arm.

Ganz liislig simmer uf de Pirsch

Vilicht gsehtmer ja was (eher kein Hirsch )?

Da! Es Äffli - scho gumpts devo!

Vo Ascht zu Ascht, es machts halt so.

Nach de Wärmi im d‘Schungel wirds dusse ganz chalt.

Doch das stört üs nöd, mir mached chum Halt.

D‘Chind mached sich ufd Suechi nach Leu und Co.

Ghörtmer ächt es Brülle, es Schnarchle oder so?

D’Affe ghörtmer, das isch klar!

Und ab und zue au d‘Chinderschar .

Krokodil, Spinne, Kakadu,

Seeleu, Fisch und au es Gnu.

Zum Beobachte gits en Huufe,

da chunt de Mittag grad richtig, nämli zum Verschnuuufe.

En Pfau macht eus da s‘Läbe schwer,

isch er doch hindrem Ässe her!

D‘Chind spiled Fangis mit em Pfauemaa,

und tüenden nöd mit leerem Buuch lah gah.

Nach de Pause gahts scho witter,

Es hät no Tiger hinder Gitter!

Und Zitteraal womer mues sichte -

Es wird nöd langwiilig, mitnichte!

Am Nami gahts dänn zrugg, mitem 6er-Tram,

zum Bahnhof laufed dänn alli schnäll und schtramm!

De Zug wird gsuecht und gschwind au entdeckt,

de Dedektivsinn bide Kids isch nämli gweckt!

Nach Papagei-Finde isch doch sunneklar,

ischs Gleis ufzueche ganz eifach, ehrlich wahr!

D‘Plätz sind ignoh, de Zug fahrt ab,

Doch d‘Chinde blibed no uf Trab.

Spile, schwätze, Fotis sichte,

dihei gits sicher no meh zbrichte!

Vom Nashorn wo isch nur fuul?

Vom Leu wo ufsperrt s’grossei Muul?

Vom Zitteraal wo zitteret?

Vom Wolf wo Chinde witteret?

Oder ächt vom räuberische Pfau?

Egal was, mir säged jetz tschau!

De Zürizoo er isch de Hit!

Chunschs nöchscht mal au mal mit eus mit?